O Municipal Bernardino Breijo viviu unha tarde especial. Sol, sen vento e ambiente de derbi, deses que sempre cumpren. A UD Cebarca estreaba a equipación conmemorativa do 50 aniversario, dando así comezo ao ano dunha celebración que queremos vivir coa nosa xente e co orgullo de representar Cerdido.
Non puido ser cun triunfo como nos gustaría, pero si cun equipo que, a pesar de chegar mermado por baixas, competiu de ti a ti co líder e deixou unha segunda parte de moito nivel.
Un inicio con infortunio e polémica
O partido púxose costa arriba moi cedo. Nunha falta botada pola dereita, pegada á banda, o balón chegou envenenado ao pau curto de Trullo, que tras tocar no pau logra agarrar. Quedou a dúbida de se a pelota entrara —ou polo menos en toda a súa totalidade—, pero o colexiado deu validez ao gol de maneira inmediata.
Na primeira metade o San Sadurniño estivo máis cómodo e o Cebarca tivo que traballar moito sen balón. Suso sufriu para conter a un Seny Sohna moi físico, e no 30’ viu unha amarela que condicionaría a súa continuidade, sendo substituído no descanso.
Lesión de Pablo e máis contratempos
Outro momento clave chegou no 36’. Pablo Aneiros e o rival disputan un balón con exceso de ímpetu e Pablo leva a peor parte, quedando mancado. O árbitro interpretou falta de Pablo e amonestouno, xerando a indignación do noso banco. O míster Fernando Gundín tamén vería amarela ao reclamar o que se entendeu como un planchazo do rival na acción que provocou a lesión. Pablo tivo que deixar o campo e entrou Víctor Bouza no seu lugar.
Un Cebarca valente e un golazo para empatar
No descanso, como estaba previsto, Marcos Balseiro ingresou por Suso.
A segunda parte foi outra historia. O equipo saíu a polo partido, presionando arriba e crendo ata o final. E o premio chegou no 58’: golazo de Javi, que remata de primeiras coa dereita tras un gran centro de Víctor, que recuperara un balón no pressing. O Bernardino Breijo explotou e o partido quedou aberto.
A partir de aí, o Cebarca tivo ocasións claras para poñerse por diante: un cabezazo de Mathias que marchou fóra ou unha deixada de Javi para Antón, que finalizou á figura do porteiro. O equipo estaba por riba, e merecía máis.
Un penalti que non chegou… e o xerro de auga fría
No 81’, nunha acción pola dereita, Alex gañou liña de fondo e puxo un pase atrás buscando a Antón. O balón impactou na man dun defensor rival, nunha xogada moi próxima ao colexiado, pero non se sinalou nada. Xa nos minutos finais, arredor do 90’, Javi estivo a piques de culminar a remontada cun lanzamento de falta maxistral que se estrelou no pau, no que puido ser o 2-1.
E xa se sabe: quen perdoa, sofre. Nunha das últimas accións do encontro, nun balón parado, chegou o 1-2, un xerro de auga fría para todo o esforzo realizado. Xa non quedaba tempo para reaccionar.
Orgullo e rabia: quedan batallas
Quedamos coa sensación de que se nos escaparon puntos ao final, pero tamén co orgullo dun equipo que respondeu con carácter nun día moi simbólico para o club. A estrea do 50 aniversario non trouxo premio, pero si unha mensaxe clara: este Cebarca compite sempre, unido e valente, co Bernardino Breijo empurrando como o que é: a nosa casa.
Parabéns ao C.F. San Sadurniño pola vitoria, e moita forza para Pablo Aneiros na súa recuperación.
💙🤍 Imos Cebarca!
#ImosCebarca #50AnosXuntos
UD CEBARCA 
Deja un comentario